QR Eńbek jáne halyqty áleýmettik qorǵaý mınıstrliginiń Dúnıejúzilik banktyń qarjylaı jáne tehnıkalyq qoldaýymen júzege asyryp jatqan «Eńbek daǵdylaryn damytý jáne jumys oryndaryn yntalandyrý» jobasy aıasynda Qazaqstanda tuńǵysh ret qysqa merzimdi oqytý qyzmetterin usynatyn uıymdardyń tizilimi qurylady. Uıymdar men oqý baǵyttarynyń biryńǵaı tizimi qandaı da bir kýrstan ótkisi keletinder úshin úlken jeńildik bolmaq.

Tolyq tizimdi qurý úshin oqý qyzmetterin usynatyn jetkizýshiler osy iske keńinen yntymaqtasýǵa shaqyrylyp otyr. Nıet bildirgen uıymdar olardy ońaı taýyp berýge múmkindik beretin tizimge enip qana qoımaı, árbir uıym Dúnıejúzilik banktiń ádistemesi boıynsha táýelsiz baǵalaý rásiminen ótetin bolady. Bul ádisteme arqasynda uıym óz qyzmetteriniń sapasy qandaı deńgeıde ekendigin túsinip, qysqa merzimdi oqytý júıesindegi óz ornyn anyqtap bile alady. Baǵalaýdan ótken uıymdar sapany kóterý, kórsetiletin oqý qyzmetterin ózektendirý jóninde keńester túrindegi tegin sabaǵattyq kómekke qol jetkizedi.

Osy tusta uıymdardyń barlyǵy ádil túrde baǵalanady. Qandaı menshik túrine jatpasyn, elimizdiń barlyq óńirlerindegi kez kelgen oqý ortalyqtarynan ótinimder qabyldanady, ıaǵnı eshbirine shekteý qoıylmaıdy.

Onyń ústine, qyzmetteri aıtarlyqtaı joǵary baǵaǵa ıe bolǵan uıymdar jumyssyz jáne ózin nátıjesiz jumyspen qamtyp otyrǵandardy oqytý úshin tapsyrys alýǵa úmitker bola alady. Al olardyń oqýy Jobany júzege asyrý aıasynda tólenetin bolady.